Як палягчэлі ў дрэваў кроны!..

Як палягчэлі ў дрэваў кроны!
Свіціцца будуць і расці
Аж навылёт у сінь прахоны
У парадзелым іх лісці.

Што верасам на сонцы сніцца?
Як трапятацца перастаць
Асінніку на звон сініцы
Ад панізовага куста?

Пайду без думак адмысловых
Туды палянай нацянькі,
Дзе ў верасовых сцішных сховах
Яшчэ растуць баравікі, —

У свет знаёмы і радзінны, —
Не на журбу, не на бяду,
I ніць празрыстай павуціны
He абыду, не абыду.