творчасць

RSS Feed

Зноўку магчымыя мары...

Сярэдняя: 5 (3 галасоў)

Зноўку магчымыя мары,
Зноўку адчынены дзьверы -
Золатам лёг на абшары
Верасень - месяц веры.

Скончу жніво на золку,
Серп над ракой павешу,
Непаслухмяныя зоркі
Тройкай пастаўлю над вершам.

Лістапад. Разгадкавы спакой...

Сярэдняя: 3.4 (5 галасоў)
Лістапад. Разгадкавы спакой.
А ў цішы так хораша і ясна.
Не шкада, што кружыцца дачасна
Зелянцовы лісцік нада мной.

Ведаю: адолею бяду
I наклічу радасць выпадкова.
Я сама сабой,
                       калі вяду
З болю непрыручанае слова.

У Іслацкай восені

Сярэдняя: 5 (1 голас)

Стынуць у полі слупы,
Дрэмле аціхлая просінь.
Нехта – у лес па грыбы,
Я ж у яго – па восень.

Лёсу малоцяць цапы –
Ні паратунку, ні рады:
Нехта – у лес па грыбы,
Я ж у яго – па праўду.

Дзіва ўцікуе й сляпы –
Верасу жмуцца краскі:
Нехта – у лес па грыбы,
Я ж у яго – па казкі.

Лісцем стракатым, рабым
Вочы сцяжына цешыць:
Нехта – у лес па грыбы,
Я ж у яго – па вершы…