Анатоль Вялюгін

RSS Feed

Дрымотная мільгае ліставея...

Сярэдняя: 3.7 (3 галасоў)

Дрымотная мільгае ліставея.
На тратуарах лета іржавее.
У просіні
над вежамі,
над рэкамі
жураўліны рэквіем.

З вясёлым смуткам асыпайся, лісце
забранзавелых каляндарных ісцін.
Вятрамі не развеяна,
не страчана
маладосці спадчына.

За вугальнай смугой дэпо і фабрык
прастор свіціцца, як наліты яблык,
хоць журыцца
над вежамі,
над рэкамі
жураўліны рэквіем.

Уральская восень

Сярэдняя: 5 (2 галасоў)

А. Агафонаву

Аскомай на зубе трашчыць
рубін кіславатай брусніцы.
Харыус блісне ў карчы
з водмелі быстрай крыніцы.

I полаз-вужака ля скал
апошняю ласкай сагрэта.
Толькі паспелая сталь
бушуе, як вечнае лета.

Здымай са сцяны карабін!
I там, дзе паўстанак двухсоты
запырскае кіслы рубін
патронаў халодныя соты.

Усе аўтары